有唔少“糖友”或者血糖偏高嘅人士都以為糖尿病係唔可以食粉麵飯同埋甜食，因此而抗拒所有澱粉質類食物。但原來拒絕食碳水化合物係唔會幫助到穩定血糖，反而會令身體因長期處於低血糖狀態，繼而出現頭暈，集中力下降，手震，肌肉流失同埋增加體內壓力荷爾蒙（adrenaline）釋放，導致心跳加速，增加心血管疾病風險！所以有糖尿病並唔建議戒糖，而係要按個人身體狀況適量地進食澱粉質同埋選擇合適嘅碳水化合物。今日就等註冊營養師話你知應該點選擇啦。
碳水化合物係我地身體非常重要嘅營養素之一，主要功能係提供身體足夠能量維持日常活動，提供充足膳食纖維同維他命B。所以攝取適量碳水化合物係我地日常飲食入面可以話係必不可缺。
碳水化合物都有分“精製碳水”同“複合碳水”，“精製碳水”主要係經過各種加工工序而成，係加工過程中流失大量嘅營養素同纖維，令營養價值大大降低，而升糖指數大大提高！最常見嘅例子就係白麵包，白飯，粉麵類，甜食等等，進食呢類精製碳水容易令血糖突然飆升，促進胰島素分泌，令血糖又快速下降，導致血糖不穩定。
而“複合碳水” 係指比簡單碳水化合物需要更多時間消化嘅澱粉以及比較難消化嘅膳食纖維等等，大多以原型食物為主。例如係番薯，粟米，全麥麵包，南瓜，蘿蔔等等。呢一類“複合碳水”富含膳食纖維，可以延長飽肚感，食物中營養素嘅完整性保留較好，升糖指數亦較低，對於穩定血糖黎講非常有幫助，所以血糖偏高人士或糖友不妨可以多選擇“複合碳水”，同時可以配合蛋白質同蔬菜一齊進食，加入適量嘅優質脂肪，咁就可以更有效長遠地控制好血糖啦。
對於“糖友”黎講，血糖不穩定或長期處於低血糖都有機會引致各種併發症，例如係心血管疾病，中風，糖尿上眼等等症狀。所以建議糖友除左要避免或減少進食精製碳水嘅食物之外，亦都要避免長期低血糖嘅狀態，要定時適量進食碳水化合物，穩定血糖，避免出現頭暈，手震，肌肉流失及增加心血管負擔。